តាវកាលិកមានន័យដូចម្ដេច?

តាវកាលិកមានន័យដូចម្ដេច ?

          ពាក្យតាវកាលិក ត្រូវបានប្រើប្រាស់ជាច្រើននៅក្នុងវិស័យច្បាប់ការងារ រដ្ឋប្បវេណី និងច្បាប់ផ្សេងទៀត ។ តើតាមពិត ពាក្យនេះមានន័យយ៉ាងដូចម្ដេចនោះ វីដេអូនេះនឹងដកស្រង់សេចក្ដីពន្យល់នានាជូន ។

          តាមន័យដើម ដែលកំណត់នៅក្នុងវចនានុក្រមខ្មែរ ពាក្យតាវកាលិកនេះ ប្រើជានាមសព្ទ សំដៅដល់វត្ថុដែលប្រព្រឹត្តទៅបានតែក្នុងកាលប៉ុណ្ណោះ, របស់ដែលកើតឡើង ឬដែលប្រើប្រាស់បានក្នុងកាលដ៏ខ្លី ឬក៏ក្នុងកាលមានកម្រឹត; របស់ខ្ចីគេ ។

វចនានុក្រមខាងលើ បានបន្ថែមថា ពាក្យតាវកាលិក អាចប្រើជាគុណនាមក៏បាន ។ ឧទាហរណ៍របស់ជាតាវកាលិក ។

សទ្ទានុក្រមច្បាប់ ផ្នែករដ្ឋប្បវេណី និងនីតិវិធីរដ្ឋប្បវេណី ដោយ ទីស្ដីការគណៈរដ្ឋមន្ត្រី ឆ្នាំ ២០០៧ បានពន្យល់ពាក្យតាវកាលិក (Prestation) ថាជាវត្ថុ ឬសកម្មភាពដែលជាទីតាំង (ឬជាកម្មវត្ថុ) នៃកាតព្វកិច្ច ។

សទ្ទានុក្រមនេះ បានលើកឧទាហរណ៍ថា តាវកាលិករបស់អ្នកទិញ គឺបង់ថ្លៃទៅឱ្យអ្នកលក់ ឯតាវកាលិករបស់អ្នកលក់ គឺប្រគល់វត្ថុ ទៅឱ្យអ្នកទិញ ។

បេឡាជាតិសន្តិសុខសង្គម (ប.ស.ស) បានឱ្យនិយមន័យ តាវកាលិកថា គឺជាប្រាក់ វត្ថុ ឬសេវា ដែលត្រូវផ្ដល់ឱ្យដល់សមាជិក ប.ស.ស នៅពេលចាស់ជរា ទុព្វលភាព (ទ្រុឌទ្រោម) និងនៅពេលទទួលរងហានិភ័យការងារ ទៅតាមកាលកំណត់មួយ ។